Vill að Ísland sækist eftir undanþáguákvæði í komandi loftlagssamningum

Íslensk stjórnvöld eiga að freista þess að fá aftur undanþáguákvæði vegna takmarkana á losun gróðurhúsaloftegunda þegar loftlagssamningur Sameinuðu þjóðanna verður endurnýjaður árið 2012. Þetta kom fram í máli Geirs H. Haarde, forsætisráðherra, í fyrirspurnartíma á Alþingi í dag.

Valgerður Sverrisdóttir, þingmaður Framsóknarflokksins, lagði fram fyrirspurnina. Spurði hún eftir stefnu ríkisstjórnarinnar hvað varðar svokallað íslenskt ákvæði í Kyoto bókuninni. Í máli Valgerðar kom fram að áliðnaður hafi stóraukist hér á landi á undanförnum árum og á næstu árum muni verðmæti álútflutnings verða meiri en útflutningur á sjávarafurðum.

Í máli Geirs H. Haarde, forsætisráðherra, kom fram að ríkisstjórnin hafi enn ekki mótað stefnu um þetta. Hins vegar sé það hans mat að íslensk stjórnvöld eigi að freista þess að fá aftur undanþáguákvæði á grundvelli sérstöðu landsins. Vísaði hann til smæðar hagkerfisins og mikilvægi þess að takmarka ekki möguleika landsins til framtíðar. Sagði ráðherra ennfremur að ríkisstjórnin hafi nú þegar falið starfshópi að móta samningsmarkmið Íslands vegna loftlagssamningsins.

Þingmenn Vinstri grænna mótmæltu orðum forsætisráðherra. Töldu þeir fráleitt að sækjast aftur eftir undanþágu. Guðfríður Lilja Grétarsdóttir benti á að nú þegar væru losun gróðurhúsaloftegunda hér á landi með því mesta sem gerist í Evrópu miðað við mannfjölda.