Ljósastaurar standast ekki Evrópustaðla

Ljósastaurar við vegi eins og Reykjanesbraut, Vesturlandsveg og víðar standast ekki Evrópustaðla. Þeir eru taldir hættulegir og hafa aldrei verið árekstrarprófaðir.

Þetta kemur fram á heimasíðu Félags íslenskra bifreiðaeigenda þar sem greint er frá niðurstöðum svokölluðs Eurorap-verkefnis. Eurorap er evrópskt verkefni sem metur öryggi vega í Evrópu og víðar. Það er unnið af bifreiðaeigendafélögum í hverju Evrópulandi um sig.

Euorap hefur skoðað alls 2450 kílómetra af íslenska vegakerfinu. Niðurstöður verkefnisins sýna að ljósastaurar á Reykjanesbraut, Vesturlandsvegi og víðar hafa aldrei verið árekstraprófaðir. Af árekstrum sem orðið hafa við staurana á umræddum vegum teljast þeir mjög hættulegir og hættulegri en hægt er að una við segir á síðu félags íslenskra bifreiðaeigenda. Ítrekað hafi komið í sað þeir gefa ekki eftir við árekstur eins og þeir ættu að gera. Staurarnir séu hannaðir og smíðaðir á Íslandi.

Sömu sögu sé að segja af vegriðum víða í vegakerfinu. Þá sé talið að gagnsemi til að mynda vegriða á nýju brúnni yfir þjórsá og vegriða Borgarfjarðarbrúarinnar sé lítil sem engin.

Á heimasíðu Vegaerðarinnar segir að niðurstöður Eurorap verkefnisins hafi verið teknar til skoðunar og frá því í sumar hafi ástandið verið yfirfarið á vegunum. Festingar staura víða á Reykjanesbrautinni hafa verið lagfærðar og unnið sé að því að ljúka þeirri vinnu.