Lífrænum loðdýraúrgangi breytt í útflutningsverðmæti

Íslensk loðdýrarækt breytir sjö þúsund tonna úrgangi í fimmhundruð milljóna króna útflutningsverðmæti, segja loðdýrabændur. Þeir segja aðgerðir umhverfissinna gegn loðdýrabúum í Evrópu aðeins hrekja slíkan rekstur til ríkja þar sem eftirlit er ekkert.

Brotist var inn í minnkabú í Danmörku í síðustu viku og þúsundum minnka hleypt úr búrum. Dýraverndunarsinnar eru grunaðir um verkið. Björn Halldórsson, formaður Samtaka íslenskra loðdýraræktenda, telur slíkar aðgerðir byggðar á vanþekkingu. Hann segir fólk með misskildar hugmyndir um að það sé farið illa með dýrin. Að sönnu sé það gert sums staðar, sérstaklega í Austurlöndum, en ein af afleiðingum mótmælanna sé að framleiðslan hafi flust frá Evrópu og austur eftir. Þar sé sums staðar ekkert eftirlit með ræktuninni.

Hann segir loðdýraræktina umhverfisvæna. Þannig séu sjö þúsund tonn af úrgangi sem annars væri grafinn, urðuð á sérstakan hátt með ærnum tilkostnaði og þessu sé breytt í útflutningsverðmæti upp á 500 milljónir króna. Þarna sé um mikil sóknarfæri að ræða ef menn vilji breyta lífrænum úrgangi í verðmæti.