Þegar farnir að krefjast hæstu vaxta

Sparisjóðir og Frjálsi fjárfestingarbankinn eru þegar farnir að krefjast hæstu vaxta ef íbúðalán með 4,15 prósenta vöxtum skipta um hendur vegna íbúðakaupa eins og Kaupþing hefur boðað frá og með næstu mánaðamótum.

Þetta mun vera almenna reglan þótt dæmi séu um undantekningar. Samkvæmt heimildum fréttastofunnar hefur það þegar orðið til þess að ekkert hefur orðið af einstaka viðskiptum.

Sömu heimildir benda á að áhrifa af breytingunni hjá þessum aðillum gæti sára lítið miðað við áhrifa af breytingunni hjá Kaupþingi þar sem Kaupþing hafi lánað mest allra peningastofnana á 4,15 prósenta vöxtum fyrir þremur árum.

Þá er almennt búist við því að hinir stóru bankarnir muni grípa til svipaðra aðgerða á næstunni líkt og þeir hófu lán til íbúðakaupa á lágum vöxtum í kjölfar þess að Kaupþing gerði það.

Loks er það rifjað upp að nú eru aðeins tvö ár í að Glitnir geti, samkvæmt ákvæðum í lánasamningum, hækkað vexti af íbúðalánum, sem bankinn veitti fyrir þremur árum án þess einu sinni að um kaup eða sölu verði að ræða á viðkomandi fasteign.