Nauðlendingin á Egilsstöðum: Slökkviliðið langt frá því að vera undirmannað

„Átta mínútum fyrir lendingu vélarinnar voru allir klárir og það má segja að það hafi verið toppmæting í þetta útkall," segir Baldur Pálsson, slökkviliðsstjóri brunavarna á Austurlandi, um nauðlendinguna á Egilsstaðaflugvelli í gærkvöldi.

„Ég var nýbúinn að horfa á þessa umfjöllun um slökkviliðið á Keflavíkurflugvelli þegar útkallið kemur," segir Baldur en í gær voru umræður í fjölmiðlum um mannafla slökkviliðsins á Keflavíkurflugvelli.

Héldu slökkviliðsmenn þar því fram í gær að þeir væru of fáliðaðir ef upp kæmi eldur og þeir þyrftu að fara inn í flugflak. Þar eru minnst 10 manns á vakt en Baldur segir að 14 menn hafi mætt frá Brunavörnum Austurlands í útkallið á Egilsstöðum í gærkvöldi.

„Það bættust síðan við fjórir menn frá Flugstoðum og ég er fimmtándi liðsmaður slökkviliðsins sem stjórnandi. Þetta gekk mjög vel og þegar vélin lenti vorum við með fjóra reykkafara tilbúna ef á hefði þurft að halda."

Baldur segir að sjö menn séu á vakt í einu og öll bakvaktin fyrir utan einn hafi mætt á staðinn í gær. „Við vorum því með tvöfalt meira afl en við gerum ráð fyrir að þurfi. Við berum höfuðið hátt í dag."

Baldur telur því slökkviliðið á Egilsstöðum vera langt frá því að vera undirmannað við svona aðstæður og þegar björgunarsveitafólk, sjúkrabílar, læknar og allir voru mættir hafi hann staðið gapandi yfir skipulaginu.

„Þetta er ekki í fyrsta skipti sem svona útkall kemur og við erum að þróa þetta. Engu að síður er ég mjög ánægður í dag og við munum fara ofan í þá litlu hnökra sem voru á þessu í gær."