Fáfnismenn verða Vítisenglar um áramót

Mótorhjólasamtökin Fafner Iceland MC munu væntanlega verða tekin inn í Hells' Angels um áramótin næstu. Heimildarmenn Vísis sem þekkja vel til málsins segjast fullvissir um að þetta standi til. Gerist það mun Fáfnisheitið hverfa af vestum meðlima Fáfnis og Hells' Angels merkið koma í staðinn.

Hefð mun vera fyrir því að innlima klúbba inn í samtökin um áramót. Fáfnismenn hafa unnið að miklum breytingum og lagfæringum á klúbbhúsi sínu á Frakkastíg undanfarið en Hells' Angels setja klúbbum sem óska þess að ganga til liðs við þá strangar reglur til þess að fara eftir, meðal annars um aðstöðu í klúbbhúsinu.

Talið er að einn þáttur ferðar Vítisenglanna sem komu til landsins á föstudaginn var hafi einmitt verið að taka húsnæðið út til þess að ganga úr skugga um að það uppfyllti kröfur englanna.Þrátt fyrir að Vítisenglarnir hafi ekki komist inn í landið er talið að konum, sem voru í för með þeim hafi verið falið það hlutverk að gera úttekt á húsakosti og annarri aðstöðu Fáfnismanna.

Þessi áform gætu þó verið í uppnámi þar sem eigendur hússins á Frakkastíg hafa lýst því yfir að þeir vilji Fáfnismenn burt úr sínum húsum.

Í Fáfni eru nú um 10-12 manns sem er svipuð tala og er í flestum Hells' Angels klúbbum víða um Evrópu og segjast heimildamenn Vísis telja að þeir hafi verið svokallaður "Hangaround" klúbbur hjá Hells' Angels í langan tíma.