Forsætisráðherra var tilkynnt um samning um samruna REI og Geysis Green Energy áður en kynningarfundur var haldinn á samrunanum í byrjun október. Borgarfulltrúi Sjálfstæðisflokksins segir ósmekklegt að draga forsætisráðherra inn í málið.
Kynningarfundurinn var haldinn í stöðvarstjórahúsi Orkuveitunnar í byrjun október. Fundinn sátu meirihlutinn í borgarstjórn, yfirstjórn Orkuveitunnar og fulltrúar Akraness og Borgarbyggðar.
Björn Ingi Hrafnsson fulltrúi Framsóknarflokksins í fyrrverandi og núverandi meirihluta borgarstjórnar segir Vilhjálm Þ. Vilhjálmsson þáverandi borgarstjóri hafa sagt á fundinum að Geir H. Haarde forsætisráðherra litist vel á samruna REI og Geysis Green Energy. Nokkuð óljóst hefur verið hingað til með hvað Geir hafi vitað um málið og hvenær honum hafi verið greint frá samrunanum. Gísli Marteinn Baldursson, borgarfulltrúi Sjálfstæðisflokksins, staðfesti það að Vilhjálmur hafi á fundinum sagt að hann hafi rætt málið við Geir H. Haarde. Gísli segir að hafa þurfi í huga að borgarstjóri hafi ekki vitað af ýmsum ákvæðum samrunasamningsins á þessum tíma og ósmekklegt sé að draga forsætisráðherra inn í málið.
Geir H. Haarde, forsætisráðherra, var ekki tilbúinn að veita fréttastofu Stöðvar 2 viðtal vegna málsins í dag þótt eftir því væri leitað. Í kvöldfréttum Útvarpsins sagði Geir að Vilhjálmur hefði nefnt fyrirætlanir varðandi samrunann en hann hefði ekki lagt blessun sína yfir samninginn.
