Mótmæla hækkun á aðstöðugjöldum

Iceland Express mótmælir fyrirvaralausri hækkun aðstöðugjalda í Flugstöð Leifs Eiríkssonar harðlega. Forstjóri félagsins segir að félaginu hafi ekki verið tilkynnt um hækkunina fyrr en 9. október þrátt fyrir að hún hafi tekið gildi 1. október. Hækkunin er sögð nema 56%, úr 450 krónum á hvern farþega í 700 krónur. Flugfélagið segir hækkunina nema fleiri hundruð milljónum á ári fyrir flugfélögin og viðskiptavini þeirra.

„Svona mikil hækkun á einu bretti er ólíðandi bæði fyrir okkur og almenning. Fæst fyrirtæki myndu komast upp með að hækka verðskrá sína um meira en 50% og því mótmælum við svona vinnubrögðum harðlega," segir Matthías Imsland, forstjóri Iceland Express í tilkynningu frá félaginu.

Þá segir einnig að Matthías undrist vinnubrögðin í málinu þegar afturvirk tilkynning er send út um þetta mikla hækkun þar sem búið sé að selja flugmiða langt fram á næsta ár og ekki gert ráð fyrir þessum hækkunum í þeirri sölu. Matthías óskar skýringa á því hvers vegna félagið hafi ekki fengið fregnir af þessari hækkun fyrr.

„Það vaknar sá grunur að verið sé að nota aðstöðugjöld flugfélaganna til að greiða fyrir bætta veitingaaðstöðu fyrir farþega í Leifsstöð," segir Matthías. „Þrátt fyrir umbætur í Leifsstöð, sem við tökum þátt í að greiða fyrir, hefur aðstaða okkar í flugstöðinni lítið breyst og möguleikar á umbótum ekki verið miklir. Hér virðist okkur sem verið sé að velta enn stærri hluta af stækkun flugstöðvarinnar yfir á okkur fyrirvaralaust," segir Matthías.

Hann segir einnig að sífelld fjölgun farþega í flugstöðinni ætti frekar að leiða til lækkunar á aðstöðugjöldum. „Fjölgun farþega ætti að þýða betri nýtingu á aðstöðu og þar með lægri kostnað á hvern farþega," segir Matthías.