Útköll vegna rjúpnaskyttna ekki vandamál

Formaður skotveiðifélagsins segir það ekki vandamál þó að björgunarsveitir hafi farið í ellefu útköll vegna rjúpnaveiðimanna síðan veiðitímabilið hófst, þar sem mun fleiri veiðimenn á ferðinni á sama tíma en venjulega.

Rjúpnaveiðitímabilið hefur staðið í tæpa viku en síðustu daga hafa björgunarsveitir sinnt ellefu útköllum vegna rjúpnaveiðimanna í vanda. Þannig þurftu björgunarsveitir úr uppsveitum Árnessýslu í gærkvöldi og í nótt að sækja rjúpnaskyttur sem höfðu lent í ógöngum. Björgunarsveitarmenn segja annir vegna rjúpnaskyttna hafa verið meiri þetta árið en þau fyrri.

Sigmar B. Hauksson, formaður Skotveiðifélags Íslands, segir veiðitímann aðeins átján daga og því mun fleiri veiðimenn á ferðinni á sama tíma en venjulega. Ekki sé því um að ræða mörg útköll ef miðað er við alla þá sem voru að veiðum um helgina en Sigmar telur að þeir hafi líklega verið um þrjú þúsund.

Björgunarsveitarmenn vilja taka það fram að fólk eigi að sjálfsögðu ekki að hika við að kalla eftir hjálp, sé hennar þörf.