Forseti Íslands með fyrirlestur í New Orleans

Forseti Íslands, Ólafur Ragnar Grímsson, flutti í dag fyrirlestur á ársþingi bandarísku samtakanna um jarðvegsvísindi, Soil Science Society of America. Í fyrirlestrinum fjallaði forseti meðal annars um reynslu Íslendinga við að þróa nýtingu hreinnar orku.

Fram kemur í tilkynningu frá skrifstofu forseta Íslands að um 3 þúsund vísindamenn sæki ársþing Soil Science Society of America. Fyrirlestur forsetans var tekinn upp fyrir nokkrum dögum og fluttur á skjávarpa. Forsetinn svaraði síðan símleiðis fyrirspurnum ráðstefnugesta.

Í fyrirlestrinum fjallaði forseti um hverni hættan á loftlagsbreytingum kallaði á breytingar í orkubúskap heimsbyggðar og ný viðhorf varðandi landgræðslu. Þá nefndi forseti fjölmörg dæmi úr reynslu Íslendinga við að þróa nýtingu hreinnar orku, einkum á sviði jarðhita og við að ná árangri í markvissri landgræðslu. Að lokum lagði forseti áherslu á hvernig þessi reynsla Íslendinga gæti nýst öðrum löndum.

Fyrirlestur forsetans má sjá hér.