Rónalög numin úr gildi

Ríkisstjórnin hefur lagt fram frumvarp um að lög um meðferð ölvaðra manna og drykkjusjúkra verði felld úr gildi þar sem þau eru barn síns tíma.

Lögin voru fyrst sett árið 1949 og kveða á um að sé maður handtekinn vegna ölvunar tvisvar sinnum eða oftar með skömmu millibili skuli lögreglan tilkynna nafn hans til áfengisvarnaráðunauts eða áfengisvarnanefndar.

Fram kemur í greinargerð með frumvarpinu að gert hafi verið ráð fyrir að slík nefnd eða ráðunautur væri starfandi í hverju sveitarfélagi en svo sé ekki lengur. Áfengis- og vímuvarnaráð hafi tekið við að hluta við því starfi sem áður var falið áfengisvarnanefndum og áfengisvarnaráðunautum en bein afskipti af drykkjusjúkum hafi ekki átt sér stað síðan áfengis- og vímuvarnaráð var stofnað árið 1998.

Ráðið sinni fyrst og fremst forvörnum en það sé á könnu félagsþjónustu sveitarfélaga að aðstoða drykkjusjúka og annast vímuefnavarnir. Þá er enn fremur gert ráð fyrir í lögum að meðferð drykkjusjúkra skuli vera í höndum lækna, sjúkrahúsa, heilsuverndarstöðva eða annarra stofnana, sem til þess hafa hlotið sérstakt leyfi heilbrigðisstjórnarinnar og háðar eru eftirliti hennar.