Siðanefnd BÍ: RÚV braut ekki siðareglur blaðamanna

Siðanefnd Blaðamannafélags Íslands(BÍ) úrskurðaði í dag að frétt Sjónvarpsins, þann 26.júlí síðastliðinn, um samtökin Saving Iceland hefði ekki brotið gegn siðareglum félagsins.

Í umræddri frétt greindi fréttamaður sjónvarpsins frá því að hann hefði áreiðanlegar heimildir fyrir því að þátttakendur í mótmælaaðgerðum Saving Iceland fengju greiðslur ef þeir væru handteknir af lögreglu vegna mótmæla.

Saving Iceland kærði málið til siðanefndar BÍ. Í kærunni segir að með umfjölluninni hafi verið brotið í bága við vandað fréttamennsku, fréttin hafi ekki verið rökstudd á nokkurn hátt eða heimilda getið enda hafi hún verið „uppspuni frá rótum". Umfjöllunin hafi valdið fjölda fólks sársauka og vanvirðu þar sem gefið hafi verið í skyn að mótmælendur væru „mútuþegar fremur en hugsjónafólk".

Í svari frá RÚV var bent á rétt blaðamanna til að leyna heimildum og heimildarmönnum. Það sé einungis gert í undantekningatilfellum og af mikilli varkárni. Í svarinu var bent á að talsmanni Saving Iceland hafi verið gefinn kostur á að svara fullyrðingunni og koma sjónarmiðum sínum á framfæri.

Í úrskurði Siðanefndar segir að sjónarmið Saving Iceland hafi komist nægilega á framfæri í fréttum af málinu og því skuli RÚV ekki úrskurðað brotlegt.