Mikill uppgangur í Sólheimum

Tuttugu og fimm þúsund manns heimsóttu Sólheima í Grímsnesi í sumar, sem er þyrping húsa með einungis hundrað íbúa. Reykvíkingar þyrftu að laða til sín nálega tuttugu og fimm milljónir ferðamanna á ári hverju til að ná sama árangri í ferðaþjónustu.

Mikil breyting hefur orðið á umhverfi Sólheima frá sumrinu 1930 þegar starfsemin þar hófst í fáeinum tjöldum. Húsaþyrpingin að Sólheimum hefur vaxið gríðarlega og mikið átak hefur verið á svæðinu nú í haust enda er mikill kraftur í þessu litla samfélagi.

Ferðaþjónustan er vaxandi grein sem gárungarnir segja að spretti í réttu hlutfalli við agúrkurnar og tómatana í gróðurhúsunum hjá Reyni Pétri Ingvasyni og félögum.

Á Sólheimum á einnig að reisa bakarí innan skamms sem einungis bakar úr afurðum úr lífrænt ræktuðu korni. Hluti uppskerunnar er seldur til Reykjavíkur sem hágæðavara en æ stærri hluti er boðinn gestum og gangandi á staðnum.