Vísar orðum landlæknis á bug

Sighvatur Björgvinsson, forstjóri Þróunarsamvinnustofnunar, vísar á bug gagnrýni landlæknis um að aðstoð í Malaví skili litlum árangri.

Sighvatur Björgvinsson, forstjóri Þróunarsamvinnustofnunar, er ósammála landlækni um að aðstoð í Malaví skili takmörkuðum árangri. Hann segir að Íslendingar afhendi aldrei fjármuni skilyrðislaust þegar um þróunaraðstoð er að ræða og að vel hafi tekist til í flestum tilvikum í þróunaraðstoð hjá Íslendingum.

Sighvatur segir að mat þriðja aðila sé lagt á alla þá aðstoð sem Íslendingar veiti og það sé ekki þekkt í Malaví að fólk þar bíði með útrétta hönd í stað þess að fólk reyni að bjarga sér.

Sigurður Guðmundsson landlæknir hefur gagnrýnt með hvaða hætti vestræn ríki dæli fjármagni til Afríku án þess að sjáist merki um varanlegar úrbætur. Til dæmis hafi ungbarnadauði aukist þrátt fyrir þróunaraðstoðina. Sigurður dvaldist ásamt konu sinn í Malaví í eitt ár og störfuðu þau við að treysta heilbrigðisþjónustu á svæðinu.