Fiskverkun leggst af á Bíldudal eftir nokkurra mánaða starfsemi

Fiskverkun, sem endurreist var á Bíldudal í vor eftir tveggja ára hlé, er aftur að leggjast af og hefur öllum starfsmönnum verið sagt upp. Þetta er enn eitt áfallið í atvinnumálum staðarins.

Uppsagnarfrestur er mánuður. Fiskvinnslufyrirtækið Stapar hóf fiskvinnslu á staðnum í vor en Stöpum hefur ekki gengið vel að afla hráefnis til vinnslunnar og nú bætist skerðing þorskkvótans við.

Úlfar B. Thoroddsen, forseti bæjarstjórnar Vesturbyggðar, gagnrýnir stjórnvöld harðlega fyrir að hafa ekki stutt við þessa tilraun og spyr á heimasíðu Bæjarins besta hvort það eigi vísvitandi að þurrka Bíldudal út. Þorpssálin þoli ekki meira af þessu tagi og bresturinn sé skynjanlegur og áþreifanlegur.

Þá er ákveðið að draga úr bolfiskvinnslu hjá GPG á Raufarhöfn og hefur átta mans verið sagt upp. Áður var búið að segja upp öllu fiskverkafólki á Breiðdalsvík, bolfiskvinnslu Eskju á Eskifirði verður lokað um áramót, Rammi á Siglufirði er búinn að loka rækjuvinnslunni og Humarvinnslan í Þorlákshöfn er búin að segja upp öllu starfsfólki. Þá er búið að bjóða upp fiskverkunarhúsin á Bakkafirði og þar er engin vinnsla lengur.

Fiskverkendur segja að fregnir af frekari uppsögnum verði verði líklega á mánaðarfresti í allan vetur.