Leikbær vísar gagnrýni um rasisma á bug

Elías Þór Þorvarðarson, framkvæmdastjóri Leikbæjar, segist hafa orðið var við gagnrýni á auglýsingar sem hann birtir nú í fjölmiðlum. Í þeim er það tekið fram að starfsfólks Leikbæjar tali og skilji íslensku.

„Ég hef orðið var við að það sé verið að deila á okkur út af þessum auglýsingum. Það er gefið í skyn að ég sé rasisti eða að ég sé að ýta undir einhverja þjóðernishyggju,“ segir Elías Þór og undirstrikar að það sé fjarri lagi. "Þetta er algjörlega fjarstæðukennd gagnrýni," bætir hann við.

Elías Þór segir að með því að taka fram að starfsfólk sitt tali og skilji íslensku sé einfaldlega verið að benda á mikilvægann þjónustupunkt.

Hann segist hafa orðið var við það í umræðunni undanfarið að fólk kvarti yfir því að geta ekki fengið aðstoð í verslunum á móðurmálinu. Hann hafi einnig orðið var við að yfir þessu hafi verið kvartað hjá samkeppnisaðilum sínum. Því sé eðlilegt að taka það fram í auglýsingum að allt starfsfók Leikbæjar, innlennt sem erlent, tali íslensku.

„Það er ekki gott að menn sé ásakaðir um þjóðernishyggju fyrir það eitt að vilja vernda tungumálið,“ segir Elías Þór Þorvarðarson.