Bjarni sáttur við sinn árangur

Bjarni Ármannsson, stjórnarformaður REI, segist vera mjög sáttur við árangur sinn í New York maraþoninu sem fram fór í dag.

„Ég hljóp á þremur klukkustundum og tuttugu og þremur mínútum og tel það nokkuð gott," sagði Bjarni, sem varð númer 3054 í röðinni af tæplega 38 þúsund þátttakendum. „Þetta er sjötta maraþonið sem ég tek þátt í," bætir Bjarni við, en auk þess að hafa hlaupið Reykjavíkurmaraþon þrisvar hefur hann einu sinni hlaupið maraþon í Noregi og svo Laugarveginn sem er rúmir 50 kílómetrar.

„Þetta hefur allt sinn sjarma, en ég verð að viðurkenna að ég hef sérstakar taugar til Glitnismaraþonsins," segir Bjarni þegar hann er spurður að því hvað sé skemmtilegast að hlaupa. Hann segist hafa notið þess að hlaupa um hverfi í New York sem hann fari ekki reglulega í.