Sautján hundruð manns mótmæla styttri opnunartíma á Q-bar

Rúmlega 1700 manns hafa skrifað undir áskorun til borgaryfirvalda og lögreglu um að afgreiðslutími á Q-bar í Ingólfsstræti verði ekki styttur. Borgarstjóri segir að taka verði mið af kvörtunum íbúa í nágrenni við skemmtistaði en endanleg ákvörðun verði ekki tekin fyrr en að vandlega athuguðu máli.

Borgarráð ályktaði fyrir skömmu að afgreiðslutími þriggja skemmtistaða í miðbænum, Q-bars, Mónakó og MonteCarlo yrði styttur. Þeim á að loka klukkan þrjú í stað hálf sex. Borist hafa kvartanir vegna hávaða á Q-bar í Ingólfsstræti að undanförnu og Borgarráð telur það gild rök fyrir styttum afgreiðslutíma. Ragnar Ólafur Magnússon framkvæmdastjóri Q-bars segir ósanngjarnt að skemmtistaðirnir Prikið og Sólon sem séu í nokkurra metra fjarlægð lúti ekki sömu reglum.

Rúmlega 1700 manns hafa skrifað undir áskorun til borgaryfirvalda og lögreglu og krafist þess að ákvörðuninni verði hnekkt auk þess sem Q-bar birti heilsíðuáskorun í tuttugu og fjórum stundum í gær. Dagur B. Eggertsson segir ákvörðun Borgarráðs vera lið í því að leysa vandann í miðbænum.