Lögmaður Vítisengla hefur enn ekki hitt þá

Oddgeir Einarsson, lögmaður tveggja vítisengla sem handteknir voru í Leifsstöð fyrr í dag hefur enn ekki fengið að hitta skjólstæðinga sína. Hann hefur engar upplýsingar fengið um málið og er farinn aftur til Reykjavíkur. Hann segir að ef svo fari að mönnunum verði vísað úr landi án þess að fá aðstoð lögfræðings væri það magnað.

Oddgeir segir það grundvallaratriði að menn fái að ræða við lögmann sinn í málum sem þessum, sérstaklega sé mönnunum haldið gegn vilja sínum. Aðspurður hvort einhver önnur lögmál gildi um menn sem ekki eru komnir út úr flugstöðinni segist hann ekki telja það. „Ég held að grundvallarreglur gildi alls staðar og engar sérstakar reglur gildi í þessu tilviki."

Oddgeir segir líka fráleitt að halda því fram að hægt sé að meina mönnum um landvist á grundvelli þess að þeir tilheyri ákveðnum samtökum, Hells' Angels í þessu tilviki. „Þótt aðrir einstaklingar í samtökunum hafi gerst brotlegir við lög, en ekki þeir sem hér um ræðir, set ég virkilega stórt spurningamerki við að þeim sé vísað úr landi. Það eru einstaklingar á Alþingi sem hafa brotið af sér en það setur ekki aðra alþingismenn á sama stall."

Þess má geta að Oddgeir varði á sínum tíma skipuleggjendur klámráðstefnunar Snowgathering sem til stóð að halda hér á landi á vordögum en komið var í veg fyrir. Þeim málum lyktaði á þann veg að Hótel Saga greiddi skipuleggjendunum fimm milljónir króna í skaðabætur.