Ólafur Ragnar seldi lyklakippur í Smáralind

Ólafur Ragnar Grímsson, hleypti formlega af stokkunum átaki Slysavarnafélagsins Landsbjargar "Neyðarkall frá björgunarsveitum" í Smáralind í dag. Forseti seldi lyklakippur með björgunarsveitarkonu til og tóku gestir verslunarmiðstöðvar honum vel.

„Átakið "Neyðarkall frá björgunarsveitum" stendur helgina 3. - 5. nóvember og munu björgunarsveitir og slysavarnadeildir Slysavarnafélagsins Landsbjargar selja lyklakippurnar á fjölförnum stöðum um land allt auk þess sem víða verður gengið í hús," að því er segir í tilkynningu frá Landsbjörgu.

Hagnaður af sölunni mun renna til björgunarsveita, slysavarnadeilda og Slysavarnafélagsins Landsbjargar og verður hann notaður til að efla og styrkja þjálfun björgunarsveitarmanna landsins.