Salmonella finnst aftur í nagbeini

Salmonella fannst í óinnpökkuðum svínseyrum og nagbeinum fyrir hunda úr nautgripum við eftirlit Landbúnaðarstofnunar á dögunum. Fram kemur í tilkynningu frá stofnunni að vörurnar hafi verið til sölu í gæludýraversluninni Tokyo í Hafnarfirði.

Var nagdótið innflutt frá sama framleiðanda og svínanagbein sem salmonella greindist í snemma í október síðastliðnum. Ákveðið hefur verið í samráði við innflytjandann að taka nagdótið úr sölu og farga því.

Fram kemur í tilkynningunni að salmonella geti valdið sýkingum í dýrum og í fólki en ekki hefur orðið vart sýkinga sem raktar hafa verið til þessa nagdóts. Eru gæludýraeigendur sem kunna að hafa svínseyrun og nagbeinin undir höndum hvattir til að skila þeim í verslunina Tókýó eða farga þeim með öruggum hætti.