RÚV og Árvakur máttu vinna saman í kannanamálum

Samkeppniseftirlitið gerir ekki athugasemdir við það að Ríkisútvarpið og Árvakur hafi í sameiningu samið við Capacent Gallup um gerð og birtingu vikulegra skoðanakannana á fylgi stjórnmálaflokkanna í aðdraganda síðustu alþingiskosninga.

Það var fjölmiðlafyrirtækið 365, sem meðal annars rekur Vísi, sem sendi inn kvörtun til Samkeppniseftirlitsins og taldi að samningurinn stæðist hvorki ákvæði samkeppnislaga né ákvæði laga um Ríkisútvarpið ohf.

Samkeppniseftirlitið taldi hins vegar að samingurinn rúmaðist innan almannaþjónustuhlutverks RÚV. Þá taldi eftirlitið að samstarf Árvakurs og RÚV raskaði ekki samkeppni með þeim hætti að tilefni væri til aðgerða. Hins vegar tók Samkeppniseftirlitið fram að samstarf ríkisfyrirtækja við einkaaðila gæti í vissum tilvikum raskað samkeppni og gefið tilefni til aðgerða ef slíkt samstarf veitti einkaaðilum óeðlilegt forskot í samkeppni. Sú staða væri hins vegar ekki uppi í þessu máli.