Harður árekstur á Suðurlandsvegi við Selfoss

Ökumaður fólksbíls var fluttur á slysadeild Landspítalans eftir harðan árekstur á Selfossi um ellefuleytið í morgun.

Maðurinn hugðist beygja til vinstri á Suðurlandsvegi til móts við Hrísmýri, sem er skammt innan bæjarmarka Árborgar, þegar vörubíl var ekið aftan á bíl hans. Kastaðist fólksbíllinn yfir á öfugan vegarhelming og framan á sendibíl sem kom úr gangstæðri átt.

Maðurinn sem var í bílnum sem kastaðist til var fluttur til Reykjavíkur en að sögn lögreglu á Selfossi var hann með meðvitund. Ökumenn vörubílsins og sendibílsins voru fluttir á Heilbrigðisstofnun Suðurlands til rannsóknar en þeir munu ekki hafa meiðst alvarlega.

Bíllinn sem flaug yfir á öfugan vegarhelming er talinn gjörónýtur og þá er sendibíll talinn mikið skemmdur.