Taka beri á samráði reynist ásakanir réttar

Formaður viðskiptanefndar segir ásakanir á hendur Krónunni og Bónuss, um mögulegt verðsamráð alvarlegar og taka beri á þeim reynist þær réttar. Samkeppniseftirlitið hvetur alla sem telja sig vita um ólögmætt verðsamráð í verslunum að tilkynna það til eftirlitsins.

Viðskiptanefnd Alþingis fundaði með Samkeppniseftirlitinu í höfuðstöðvum þess í Borgartúni í morgun. Málefni Krónunnar og Bónuss voru rædd á fundinum og hvernig bregðast ætti við ef um mögulegt verðsamráð væri að ræða.

Ágúst Ólafur Ágústsson, formaður viðskiptanefndar Alþingis, segir að Samkeppniseftirlitið muni kanna þessi mál og þyki ástæða til verði brugðist við af fullum þunga. Ágúst segir fákeppni á markaði alltaf áhyggjuefni.

Páll Gunnar Pálsson, forstjóri Samkeppniseftirlitsins, vill ekki fullyrða hvort um mögulegt verðsamráð sé að ræða fyrr en búið sé að kanna málið.