Stýrivaxtahækkun kom mörgum á óvart

Ákvörðun Seðlabankans í morgun um að hækka stýrivexti kom mörgum á óvart en vextir höfðu verið óbreyttir frá því í desember á síðasta ári.

Bankastjórn Seðlabanka Íslands tilkynnti í morgun að ákveðið hefði verið að hækka stýrivexti bankans um 0,45 prósentur og verða vextirnir því 13,75%.

Ákvörðunin kom mörgum á óvart en greiningadeildir bankanna höfðu spáð því að bankinn héldi vöxtum sínum óbreyttum. Seðlabankinn hafði ekki hækkað vexti sína síðan um miðjan desember á síðasta ári.

Verðbólga hefur aukist á ný en hún mældist í byrjun október 4,5% og sagði Davíð Oddson seðlabankastjóri því hafa verið ákveðið að fara þá leið að hækka vexti.

Ýmsir aðilar á vinnumarkaðnum hafa gagnrýnt vaxtahækkanir Seðlabankans. Á meðal þeirra er Landssamband íslenskra útvegsmanna en sterk króna hefur reynst þeim, líkt og öðrum útflutningsfyrirtækjum, erfið en háir vextir viðhalda sterku gengi krónunnar. Davíð sagðist skilja slíka aðila en þeir verði að muna að bankinn sé einungis að bregðast við þenslu með aðgerðum sínum. Ástæða þenslunnar sé meðal annars stóriðjuframkvæmdir, einkavæðing bankanna og skattabreytingar en ekki aðgerðir bankans.