Djúpivogur vill sameinast Egilsstöðum

Ætla mætti að eðlilegra væri að Djúpavogshreppur leitaði fyrst suður til Hornarfjarðar eða austur til Breiðdalsvíkur með ósk um sameiningu. Nei. Þessi 450 manna hreppur horfir norður yfir fjallgarðinn, til Fljótsdalshéraðs, en þar eru íbúarnir tífalt fleiri, með Egilsstaði sem stjórnsýslumiðstöð. Forsenda slíkrar sameiningar er heilsársvegur yfir Öxi, að sögn Björn Hafþórs Guðmundssonar, sveitarstjóra Djúpavogs, en einnig sú að fjármagn fáist til að greiða úr skuldunum. Djúpavogshreppur er í gjörgæslu félagsmálaráðuneytis og þarf á fjögurra mánaða fresti að senda Eftirlitsnefnd með fjármálum sveitarfélaga skýrslu um stöðu mála, samkvæmt samningi sem hreppsnefndin neitar nú að endurnýja nema ríkisvaldið grípi til sérstakra fjárhagslegra aðgerða. Hún gagnrýnir í bókun hvernig viðbótarframlagi til fjárvana sveitarfélaga í gegnum Jöfnunarsjóð er úthlutað. Hvort Djúpivogur sé neyddur til sameiningar segir sveitarstjórinn að verið sé að svelta menn til hlýðni með því að laga ekki fjárhag minni sveitarfélaga. Horft er til Fljótsdalshéraðs vegna þess að í skoðanakönnun fyrir þremur árum lýsti meirhluti íbúa Djúpavogshrepps mestum áhuga á slíkri sameiningu.