Hagar biðja Samkeppniseftirlitið að rannsaka áskanir um samráð

Vísað er til frétta Ríkisútvarpsins sem Hagar segja byggjast á sögusögnum ónafngreindra fyrrverandi starfsmanna félaginsi. Segja þeir að það hafi farið fram óvægin umræða um matvörumarkaðinn. „Sú umræða hefur farið fram í fjölmiðlum, á alþingi, í netmiðlum og víðar," segir í tilkynningu Haga.

„Þrátt fyrir að niðurstaða rannsóknarblaðamennsku fréttamanna RÚV hafi sýnt að engar verðbreytingar hafi átt sér stað í verslunum Bónus á meðan verðkönnun var framkvæmd, hefur allur fréttaflutningur og önnur umfjöllun sett Bónus undir sama hatt og verslun, sem breytti verðum á meðan á verðkönnun stóð. Rétt er að ítreka að RÚV húsmóðirin fékk sama verð og RÚV fréttakonan í Bónus," segja Hagar

Hagar vísa í yfirlýsingu sinni til umræðu á Alþingi í dag þar sem fram hafi komið að verðlagseftirliti ASÍ hefði verið úthýst og þar átt við verslanir Haga. Benda Hagar á að opinber gagnrýni félagsins hafi beinst að ónákvæmni í vinnubrögðum. Mörg dæmi séu um mannleg mistök, sem valdi því að niðurstöður verðkannana eru rangar.

Hagar hafi bent á blekkingar í tengslum við heimsóknir ASÍ 

Þá hafi Hagar margítrekað bent ASÍ á skipulögð viðbrögð og blekkingar aðila á matvörumarkaði við heimsóknum verðlagseftirlits ASÍ og brot á þeim hluta samkomulags um verklagsreglur, sem gerðar voru á milli ASÍ og SVÞ. Þær snúi að því að engar verðbreytingar eigi sér stað í verslunum á meðan verðlagseftirlit ASÍ verðkannanir. Segja Hagar að ASÍ hafi á engan hátt brugðist við þessum athugasemdum.

Þá telja Hagar ákveðnar fréttatilkynningar ASÍ eftir verðkannanir aðför að orðspori fyrirtækisins og m.a. farið fram á að dómkvaddir matsmenn fari yfir sannleiksgildi þeirra. „Dómkvaddir matsmenn munu hafa fullan aðgang að öllum gögnum Haga til þess að sannreyna hvort fréttatilkynningar ASÍ eigi við rök að styðjast eða ekki," segja Hagar

„Með framangreint í huga hljóta Hagar einnig að velta fyrir sér trúverðugleika verðlagseftirlits ASÍ, þegar framkvæmdastjóri ASÍ er fyrrum stjórnarformaður Kaupás og þar með eins af okkar samkeppnisaðilum, Krónunnar," segir að endingu í tilkynningu Haga.