Átta mánaða fangelsi fyrir að bera sig fyrir framan börn

Hæstiréttur staðfesti í dag átta mánaða fangelsisdóm héraðsdóms yfir karlmanni sem ákærður var fyrir kynferðisbrot gegn fimm börnum. Fimm mánuðir af dómnum eru skilorðsbundnir. Jafnframt var hann dæmdur til að greiða börnunum samtals 650 þúsund krónur í miskabætur.

Maðurinn var ákærður fyrir að hafa berað kynfæri sín fyrir börnunum og fróað sér að þeim viðstöddum. Var hann sakfelldur fyrir refsiverða meingerð við öll börnin.

Við flutning málsins fyrir Hæstarétti kom fram að maðurinn hefur greitt börnunum bæturnar og þá lagði hann fram vottorð frá sálfræðingi um að hann hefði leitað aðstoðar hans vegna sýnihneigðar.