MS áfrýjar dómi um vanhæfi forstjóra Samkeppniseftirlitsins

Mjólkursamsalan, Auðhumla og Osta- og smjörsalan hyggjast gagnáfrýja til Hæstaréttar dómi Héraðsdóms Reykjavíkur í máli félaganna á hendur Samkeppniseftirlitinu sem féll í síðasta mánuði.

Eins og greint var frá í fréttum úrskurðaði héraðsdómur að Páll Gunnar Pálsson, forstjóri Samkeppniseftirlitsins, skyldi víkja sæti í rannsókn eftirlitsins á meintum samkeppnisbrotum félaganna. Var það vegna orða sem hann lét falla á fundi með lögmanni félaganna og þótti láta í ljósi neikvæð viðhorf til félaganna.

Fram kemur í tilkynningu frá Mjólkursamsölunni og hinum félögunum að þau telji rétt að Hæstiréttur fjalli um það hvort aðrir starfsmenn Samkeppniseftirlitsins séu ekki einnig vanhæfir til rannsóknar málsins þar sem yfirmaður þeirra er talinn vanhæfur auk þess sem sumir þeirra hafi tjáð sig á neikvæðan hátt um starfsemi félaganna.