Borgin greiðir 263 milljónir fyrir Austurstræti 22

Tillaga þess efnis að Reykjavíkurborg kaupi lóðina Austurstræti 22 var samþykkt í borgarráði í dag. Borgin þarf að reiða fram 263 milljónir króna fyrir kaup á einkahlutafélaginu Austurstræti 22 sem er eignarhaldsfélag um lóðina. Með í kaupunum fylgja 95 milljónir í tryggingabætur eftir brunann í apríl. Kostnaður borgarinnar vegna kaupana er því 168 milljónir.

Kaup borgarinnar á lóðinni eru talin greiða fyrir því að hugmyndir sem hlutskarpastar urðu í hugmyndasamkeppni um uppbyggingu í Kvosinni nái fram að ganga. Eigendur lóðarinnar áttu byggingarrétt á lóðinni sem gerði ráð fyrir mun stærra húsi en hugmyndasamkeppnin reiknar með.

Guðmundur Steingrímsson, aðstoðarmaður borgarstjóra, fagnar því að lending hafi fengist í málinu enda sé afar mikilvægt að borgin ráði för þegar kemur að uppbyggingu á þessum mikilvæga stað í miðbænum. Guðmundur segir að stýrihópur verði stofnaður sem ætlað er að halda utan um uppbyggingu Kvosarinnar.

Á meðal helstu verkefna hópsins er að vinna ásamt ráðgjöfum borgarinnar að frekari þróun skipulagshugmynda um svæðið á grundvelli niðurstöðu hugmyndasamkeppninnar, taka afstöðu til einstakra þátta hennar og gera tillögur um uppkaup, samstarf við lóðahafa og einstaka framkvæmdaþætti.

Þá er hópnum ætlað að gera tillögu að nýju deiliskipulagi fyrir Kvosina og kanna kosti þess að stofnað verði þróunarfélag um framkvæmd og framvindu verkefnisins að hluta eða heild.

Stýrihópinn skipa þau Svandís Svavarsdóttir, Óskar Bergsson, Stefán Benediktsson, Hanna Birna Kristjánsdóttir og Gísli Marteinn Baldursson.