Ríkar þjóðir hætti að lokka til sín lækna frá fátækari ríkjum

Ríkar þjóðir heimsins eiga að hætta að lokka til sín lækna og annað heilbrigðisstarfsfólk frá fátækum ríkjum, að mati velferðarnefndar Norðurlandaráðs. Nefndin vill að Norðurlöndin hafi frumkvæði að því að gerður verði alþjóðlegur samningur sem feli slíkt í sér.

Siv Friðleifsdóttir, formaður velferðarnefndarinnar, segir afleiðingarnar af þessari þróun mjög alvarlegar og bendir á að ekki sé hægt að bólusetja ungabörn víða í Afríku vegna skorts á heilbrigðisstarfsfólki. „Þetta er siðferðisleg spurning og krefst þess að við nýtum vel þá starfsmenn sem við höfum þegar og aðstoðum vanþróuðu ríkin," segir Siv.

Ástæðan fyrir þessari þróun er sú að ríku löndin hafa ekki verið nógu öflug sjálf í að mennta heilbrigðisstarfsfólk auk þess sem hlutfall aldraðra hefur stóraukist sem hefur aukið eftirspurnina eftir fólki.

Fleiri læknar frá Benín í Afríku eru starfandi í Frakklandi en eru í Benín og fleiri heilbrigðisstarfsmenn frá Malaví eru í Manchester en í sjálfri Malaví. Á tímabilinu 1993 til 2002 hurfu 600 af 800 læknum í Gana til annarra starfa í vestrænum ríkjum.