Leitar upplýsinga um alla Breiðavíkurdrengi

Þór Jónsson upplýsingafulltrúi Kópavogsbæjar segir að samvinna hans og Breiðavíkurdrengsins Guðmundar Gissurarsonar hafi leitt til þess að nú sé leitað að upplýsingum um alla þá sem voru á Breiðuvík í gögnum Kópavogsbæjar.

"Þessi vinna er gerð í samvinnu við Breiðavíkurnefnd forsætisráðuneytisins en við höfum fengið gögn frá þeim til að vinna eftir," segir Þór í samtali við Vísir. "Þetta á við um þá menn sem áttu lögheimili í Kópavogi að sjálfsögðu."

Eins og kunnugt er af frásögn Vísi hittust þeir Þór og Guðmundur í kjölfar óánægju Guðmundar með að fá ekki öll gögn um sig frá barnaverndarnefnd Kópavogs. "Ég fékk hjá honum þau gögn sem hann hafði undir höndum, skýrslu sálfræðings, ljósrit úr fundargerðum barnaverndarnefdar og fleira," segir Þór. "Leit að upplýsingum um Guðmund er hafin og í framhaldinu var ákveðið að afla allra þeirra upplýsinga sem til eru um Breiðavíkurdrengi í gögnum Kópavogs."

Þór segir að það muni örugglega taka nokkurn tíma að safna þessu öllu saman enda djúpt á mörgum gagnanna. "Í augnablikinu leitum við öllu sem til er um Breiðavíkurdrengina frá sjötta, sjöunda og áttunda áratugnum," segir Þór. "Það hefur hjálpað okkur mikið að vera í samvinnu við Breiðavíkurnefndina því hún hefur útvegað okkur dagsetningar sem hægt er að styðjast við þegar fundargerðarbókum er flett."