Spurning hvenær olíuverðið dregur úr sókn útgerða

"Það fer að verða spurning hvenær síhækkandi olíuverð muni draga úr sókn útgerða í ákveðnar tegundir," segir Friðrik Arngrímsson framkvæmdastjóri LÍÚ í samtali við Vísir. "Í því sambandi má nefna orkufrekar veiðar eins og til dæmis kolmunnann. Við ákveðnar aðstæður nú er stutt í að þær borgi sig ekki vegna olíuverðsins."

Eins og kunnugt er af frétt hér á síðunni er olíuverðið nú í 96 dollurum tunnan og stefnir óðfluga í 100 dollara. Þetta er um 40% hækkun bara frá því í sumar. Björgólfur Jóhannsson formaður LÍÚ kom inn á þetta í ræðu sinni á síðasta aðalfundi LÍÚ en þar greindi hann frá því að olíuverð til útgerða hefði hækkað um 135% frá 2003 og næmi nú um 14 milljörðum kr. á ári.

Sveinn Hjörtur Hjartarsson hagfræðingur LÍÚ bendir á að veiking á dollar hefði vegið upp hátt olíuverð að nokkru marki en að verðið væri komið í "hættulegar hæðir" þessa stundina. Svein Hjörtur vitnar i umfjöllun í Vegvísi Landsbankans frá í síðustu viku þar sem fram kemur að olíuverðið sé við að ná þeim toppi sem það komst í við síðustu olíukreppu árið 1979 sé miðað við vísitölu neysluverðs í Bandaríkjunum.

Friðrik Arngrímsson segir að það láti nærri að olíverð sem hlutfall af rekstri útgerða hafi farið frá 10% og upp í nær 20% nú um stundir. "Þetta er kostnaður sem útgerðin þarf að bæta á sig," segir Friðik. "Og það eru ekki aðrir kostir í stöðunni en olían. Ekki förum við að gera út með árabátum á ný."