Valdamesti Vítisengill Danmerkur heimsótti Ísland - fleiri hafa fylgt í kjölfarið

Meðlimir í Vítisenglunum virðast sumir hverjir hafa sloppið í gegn um nálarauga lögregluyfirvalda þrátt fyrir markvissar aðgerðir sem miða að því að koma í veg fyrir heimsóknir þeirra. Ef marka má heimasíðu eins þekktasta engils Norðurlanda, Jörn „Jönke" Nielsen, kom hann til Íslands árið 1999. Þá virðast að minnsta kosti tveir meðlimir frá Noregi hafa dvalist hér á landi í vor.

Einn þekktasti engill Norðurlanda

Jörn „Jönke" Nielsen er talinn einn valdamesti Vítisengill Norðurlanda. Hann gekk í samtökin um 1980 og síðan þá hefur frægðarsól hans risið. Á heimasíðu Jönke er myndaalbúm sem varpar ljósi á lífshlaup hans allt frá því hann var unglingur. Þar á meðal má sjá mynd af honum fyrir framan ryðgað skipsflak og í myndatexta segir Jönke að myndin sé tekin á suðurstönd Íslands árið 1999. Ekki fylgir sögunni í hvaða erindagjörðum hann var hér á landi en myndin er greinilega tekin á Reykjanesskaganum og á þeim tíma voru höfuðstöðvar Fáfnismanna í Grindavík.

Drap Makrílinn

Jönke tók virkan þátt í stríðinu sem geisaði á milli Hells' Angels og Bullshitt mótorhjólaklíkunnar á níunda áratugnum en í þeirri valdabaráttu lágu fjölmargir í valnum. Stríðið náði hámarki þegar Jönke myrti foringja Bullshitt, sem kallaður var Makríllinn. Makríllinn var skotinn 25 skotum úr vélbyssu fyrir utan heimili sitt og vakti morðið gríðarlega athygli í Danmörku á sínum tíma. Jönke flúði til Frakklands og síðar til Kanada þar sem hann fór huldu höfði all til ársins 1988 þegar hann gaf sig fram sjálfviljugur.

Reynt að drepa hann í fangelsinu

Jönke var dæmdur í 16 ára fangelsi fyrir morðið á Makrílnum og hann var í fangelsi þegar stríð á milli Hells' Angels og Bandidos braust út. 1996 reyndu andstæðingar hans að drepa hann með því að skjóta á hann úr vélbyssu og kasta handsprengju inn í klefann hans þegar hann afplánaði dóm sinn í opnu fangelsi í Jyderup. Jönke fékk skot í síðuna og í magan en hann lifði árásina af. Þegar hann losnaði úr fangelsinu tók hann þátt í að koma á friði á milli Hells' Angels og Bandidos og er hann talinn næstráðandi í samtökunum í Danmörku á eftir forsetanum „Blondie" Nielsen. Jönke komst aftur í kast við lögin þegar hann var fundinn sekur ásamt nokkrum félögum sínum fyrir að berja mann til bana á bar í Álaborg. Jönke fékk fjögurra ára dóm fyrir þáttöku sína og hefur hann lokið afplánun.

Ævisagan fór í metsölu

Sonny Barger, forvígismaður Hells' Angels á heimsvísu, hefur verið Jönke nokkur fyrirmynd. Barger hefur verið duglegur við að hreinsa ímynd samtakanna og skipuleggja góðgerðarsamkomur. Hann hefur gefið út fjölmargar bækur um líf sitt í samtökunum og hann þreytist heldur ekki á því að árétta að Hells' Angels séu heiðvirð mótorhjólasamtök sem koma skipulagðri glæpastarfssemi ekkert við. Lögregluyfirvöld víðs vegar um heiminn eru þó fæst á sama máli. Barger sjálfur var til að mynda dæmdur í fjögurra ára fangelsi fyrir að leggja á ráðin um að sprengja höfuðstöðvar annarar klíku, „The Outlaws", í loft upp árið 1988. Jönke hefur einnig verið duglegur við að vekja á sér athygli í norrænum fjölmiðlum. Hann gaf meðal annars út ævisögu sína sem náði metsölu og hann virðist halda utan um heimasíðu Hells' Angels í Danmörku.

Þjóðverjar í heimsókn

Á heimasíðu þýsku mótorhjólasamtakanna „Daring Eagles" eru svo birtar myndir frá því í sumar þegar þeir heimsóttu Ísland. „Daring Eagles" eru ekki meðlimir í Hells' Angels en á heimasíðu þeirra kemur fram að þeir haldi „góðu sambandi við innlenda og erlenda mótorhjólaklúbba." Meðlimir klúbbsins heimsóttu Ísland síðastliðið vor og virðast hafa notið gestrisni Fáfnismanna á meðan á dvölinni stóð. Mótorhjólamennirnir kíktu í Bláa Lónið, skoðuðu Gullfoss og Geysi og virtu fyrir sér Kerið.

Norskir Vítisenglar á djamminu

Þá virðast þeir hafa skellt sér út á lífið í Reykjavík með félögum í Fafner Iceland og tveimur mönnum sem eru í leðurvestum merktum Vítisenglum frá Drammen í Noregi. Á myndunum má sjá þá í góðu yfirlæti í samkvæmi sem líklega hefur verið haldið í höfuðstöðvum Fáfnis á Frakkastíg.

Ekki fylgir sögunni í hvaða erindagjörðum Norðmennirnir á myndunum hafa verið hér á landi, né hvort þeir eru hér enn.

Hér má sjá Jörn „Jönke" Nielsen á Íslandi. Íslandsmyndin er í „Galleri".