Tafir á flugi vegna bilunar í rafmagni flugstjórnarmiðstöðvar

Umferð um íslenska flugstjórnarkerfið var takmörkuð og tafir urðu á flugi frá Keflavíkuflugvelli vegna truflunar sem kom upp í rafmagni Flugstjórnarmiðstöðvarinnar í Reykjavík fyrr í dag.

Eftir því sem segir í tilkynningu frá Flugstoðum leiddi truflunin af sér bilun í svokölluðu síafli en á því eru keyrð kerfi flugstjórnarmiðstöðvarinnar. Unnið er á varakerfi flugstjórnarmiðstöðvarinnar en reiknað er með að það taki um eina til tvær klukkustundir að að setja aftur upp aðalkerfi flugstjórnarmiðstöðvarinnar.

Aðliggjandi flugstjórnarmiðstöðvar voru strax látnar vita af biluninni og var svæðinu lokað tímabundið til að takmarka umferð nýrra véla inn í svæðið. Flugstjórnarmiðstöðin átti að vera komin í fullan gang um klukkan þrjú.