Hagar hafna ásökunum um verðsamráð og íhuga réttarstöðu sína

Finnur Árnason, forstjóri Haga hf, segir fyrirtækið hafna alfarið þeim ásökunum sem komu fram í fréttum RÚV í dag þess efnis að Bónus og Krónan eigi með sér ólöglegt verðsamráð. Hann segir um alvarlegar aðdróttanir að ræða og að Hagar muni íhuga réttarstöðu sína vegna málsins.

„Hagar hf., sem reka verslanir Bónus, Hagkaup og 10-11 hafna alfarið þeim ásökunum, sem komu fram í hádegisfréttatíma RÚV í dag og haldið var áfram umfjöllun um í síðdegisþætti RÚV þess efnis að Bónus og Hagkaup séu aðilar að ólöglegu verðsamráði á matvörumarkaðnum hér á landi og beiti blekkingum gagnvart viðskiptavinum sínum við gerð verðkannana," segir í tilkynningunni. „Hér er um að ræða alvarlega aðför að orðspori fyrirtækisins og æru starfsmanna þess. Undir henni verður ekki setið þegjandi og munu Hagar hf. íhuga réttarstöðu sína vegna þessa."

Þá segir í tilkynningunni að Bónus hafi frá upphafi verið leiðandi hér á landi í sölu matvæla til almennings á lágu verði. „Aldrei frá stofnun félagsins og til dagsins í dag hefur átt sér stað samráð við keppinauta á markaði. Hið sama gildir um aðrar verslanir Haga hf."