Innlent

Hátt í fjögur þúsund nöfn í undirskriftarsöfnun

MYND/Stöð 2

Hátt í fjögur þúsund undirskriftir hafa safnast í átaki sem Hannes Friðriksson, íbúi í Reykjanesbæ, hóf í gær vegna málefna Hitaveitu Suðurnesja. Hannes segist hafa fundið fyrir sterkum viðbrögðum og að Hafnfirðingar, sem einnig eiga hlut í Hitaveitunni, hafi einnig lýst vilja til að taka þátt í undirskriftarsöfnuninni.

Hannes hóf undirskriftarsöfnunina í gær en í henni er skorað á alla sveitarstjórnarmenn á Reykjanesi að leita allra leiða til að tryggja að orkuöflun og sala á vatni og rafmagni verði ekki færð í hendur einkaaðila og að Hitaveita Suðurnesja verði í meirihlutaeign sveitarfélaganna. Hugsanlegt er að töluverðar breytingar verði á hluthafahópi Hitaveitu Suðurnesja í tengslum við samruna REI og Geysi Green Energy og hafa heyrst áhyggjuraddir þess efnis að hitaveitan komist í meirihlutaeigu einkaaðila.

Hannes sagði í samtali við Vísi að hann hefði fengið sterk viðbrögð eftir að fjölmiðlar greindu frá framtaki hans en hann safnar bæði undirskriftum á Netinu á heimasíðunni www.askorun2007.is og á blöðum. Segir hann undirskriftirnar farnar að nálgast fjögur þúsund. „Svo hafa Hafnfirðingar hringt og vilja taka þátt," segir Hannes en Hafnarfjarðarbær á hlut í HS sem hugsanlega rennur inn í REI. Hannes segir að hann hafi ákveðið að taka undirskriftir Hafnfirðinga með en þær verða aðgreindar frá undirskriftum Suðurnejsamanna.

Undirskriftalistann hyggst Hannes svo afhenda 10. nóvember á fundi Sambands sveitarfélaga á Suðurnesjum.

Mest lesið


Fleiri fréttir

Sjá meira


×

Mest lesið