Þóra í Atlanta fær hálfa milljón

Eiríkur Jónsson blaðamaður var í dag dæmdur í Héraðsdómi Reykjavíkur fyrir meiðyrði í garð Þóru Guðmundsdóttur í Atlanta og dæmdur til þess að greiða henni 500 þúsund krónur í skaðabætur.

Um er að ræða grein sem birtist í Séð og heyrt undir fyrirsögninni "Þóra er blönk" og er Eiríkur höfundur greinarinnar. Snérist málið um einbýlishús sem Þóra lét byggja fyrir sig og gekk þeim sem það gerði erfiðlega að fá greitt fyrir vinnu sína.

Mikael Torfasyni þáverandi ritstjóra Séð og heyrt var einnig stefnt en hann var sýknaður.

Þorsteinn Svanur Jónsson sem seldi Þóru einbýlishúsið var einnig sýknaður. En Þorsteinn höfðaði mál gegn Þóru sem var þingfest skömmu áður en umdeild ummæli birtust í Séð og heyrt. Þau náðu sátt í því máli og málið því fellt niður.

Eftirfarandi ummæli voru hinsvegar dæmd dauð og ómerk

"Þóra er blönk"

"Þóra Guðmundsdóttir í Atlanta hefur látið byggja stærsta einbýlishús í Kópavogi í Asparhvarfi en gallin er bara sá að hún hefur ekki enn borgað krónu í því."

"Hann er að bíða eftir 120 milljónum frá einni ríkustu konu landsins. Sjálfur er hann farinn að halda að Þóra sé blönk."

"Svanur í Trompverki segist hafa ætlað að afhenda Þóru húsið fyrir ári en ekki gert það þar sem hún hafi ekki enn borgað krónu í því."

Einnig voru nokkur ummæli sem Þorsteinn Svanur lét hafa eftir sér dæmd dauð og ómerk.

"Hún hlýtur að vera orðin blönk...."

"Og hún virðist blönk því hún hefur ekki einu sinni greitt gatnagerðargjöldin, hvað þá sérpöntuðu flísarnar frá Kína sem ég pantaði og klæddi húsið með að utan."

"Nema hún sé orðin blönk...."

Ummælin "Þóra í Atlanta borgar mér ekki" sem birtust á forsíðu blaðsins eru hinsvegar ekki dæmd dauð og ómerk eins og farið var fram á.

"Ég er bara mjög ánægð með þetta og ætla ekki að fara út í nein smáatriði," segir Þóra Guðmundsdóttir í samtali við Vísi.

Hún ætlar ekki að fara með mál Mikaels og Þorsteins Svans lengra en þeir voru sýknaðir eins og fyrr segir. "Ég ætla bara að láta staðar numið hér," sagði Þóra greinilega ánægð.

Mikael Torfason var ekki búinn að lesa dóminn þegar Vísir náði af honum tali og vildi því ekki tjá sig efnislega um hann.