Einkaþotuflugmaður ósáttur með Icelandair

„Þeir virðast leyfa sér að færa skilrúmið aftur fyrir sæti í almennu farrými og selja þau síðan sem sæti á Buisness Class," segir Egill Örn Guðmundsson sem er allt annað en sáttur með flugferð sína með Icelandair til London í morgun.

„Ef það er uppselt í Buisness Class þá er bara uppselt," segir Egill Örn sem borgaði fyrir miða á Buisness Class en var settur í venjulegt sæti í morgun að eigin sögn.

„Tjaldið var bara fært til og því var ég í sömu sætum og til dæmis fólkið sem er að hoppa til London fyrir einhvern 10 þúsund kall," segir Egill en hann var staddur á Heathrow flugvelli á leið í tengiflug þegar Vísir náði af honum tali.

Egill segir að svörin sem þjónustustjóri Icelandair hafi gefið væru á þá leið að hann hefði fengið Buisness Class þjónustu og því ekkert sem hægt væri að gera fyrir hann. „Ég fékk einhverjar tvær ommelettur, aðra með aspars og hina með spínati. Ég borða hvorugt þannig að ég þurfti að sætta mig við fjóra ávaxtabita og tvær ostsneiðar."

Agli var sagt að ommeletturnar séu fyrir Buisness Class farþega og því hafi hann fengið viðeigandi þjónustu. „Mér finnst bara allt í lagi að vara fólk við þessu. Ég hef ekki lent í nákvæmlega þessu en það er alltaf eitthvað vesen þegar kemur að Icelandair."

Sjálfur starfar Egill sem einkaþotuflugmaður úti í heimi og er því vanur flugvöllum og flugfélögum. „Mér var bara sagt að þetta væri alltaf svona í London fluginu. Það er bara engin afsökun."

Guðjón Arngrímsson upplýsingafulltrúi Icelandair segir mjög algengt að farið sé með Buisness Class sætin aftur í vél. „Nú þekki ég ekki hvaða vél þetta var sem þessi viðskiptavinur flaug með því þetta er breytilegt eftir vélum."

Guðjón segir muninn á Buisness sætunum og hinum vera þann að framan í vélinni séu 2 stór sæti í stað þriggja eins og er aftan í. „Þegar þetta er fært aftur í er miðju sætið haft autt. Vissulega er aðeins minna pláss en sætið við hliðina á þér er autt. Að öðru leyti er þetta sama þjónusta."

Að sögn Guðjóns eru Buisness Class miðarnir sveigjanlegri en aðrir og þeim auðveldara að breyta. „Síðan færðu líka aðgang að betri stofum í flugstöðvarbyggingunni."

Guðjón segir Icelandair þjónusta þúsundir manna á hverjum degi og það sé óhjákvæmilegt að einhverjir séu ósáttir. „Nákvæmlega þetta hefur hinsvegar ekki verið neitt sérstakt umkvörtunarefni í gegnum tíðina."