SBV mátti auglýsa könnun á þjónustugjöldum

Málið má rekja aftur til ársins 2004 en þá kvörtuðu Neytendasamtökin til Samkeppnisstofnunar undan sjónvarpsauglýsingu Samtaka banka og verðbréfafyrirtækja þar sem fullyrt var að þjónustugjöld banka væru lægst á Íslandi af öllum norrænu ríkjunum. Auglýsingin byggðist á könnun sem SBV, sem nú heitir Samtök fjármálafyrirtækja, lét gera. Neytendasamtökin töldu auglýsingarnar villandi og ósanngjarnar gagnvart neytendum og könnunin sem vísað var í hefði verið gölluð.

Samkeppnisstofnun var hins vegar lögð niður og verkefni hennar færð til Samkeppniseftirlitsins og Neytendastofu. Þremur árum eftir kæruna, eða í sumar, komst Neytendastofa svo að því að auglýsingin bryti í bága við lög um eftirlit með óréttmætum viðskiptaháttum og gagnsæi markaðarins.

Samtök fjármálafyrirtækja leituðu með málið til áfrýjunarnefndar neytendamála sem sneri úrskurði Neytendastofu. Fram kemur í úrskurði áfrýjunarnefndar að í auglýsingunum hafi neytendur verið hvattir til að kynna sér könnun SBV.

Fyrir hafi legið að Neytendasamtökin hefðu ítrekað á árunum 2002 og 2003 fullyrt að þjónustugjöld banka á Íslandi væru hærri en þjónustugjöld erlendra fjármálafyrirtækja. SBV hefði því látið vinna fyrir sig umrædda könnun og auglýsingarnar byggðust á þeim upplýsingum sem þar var að finna. Þá hafi efni skýrslunnar og forsendur verið birtar með aðgengilegum hætti. Ekki yrði því talið að auglýsingarnar hafi verið ósanngjarnar gagnvart neytendum.