Nýtt met í fjölda ferðamanna í einum mánuði

Ferðamenn sem heimsóttu landið í einum mánuði fóru í fyrsta sinn yfir áttatíu þúsund í sumar og það bæði í júlí og ágúst. Fram að því var mesti fjöldi í einum mánuði tæplega 70 þúsund ferðamenn, í ágúst 2006.

Í frétt frá Ferðamálastofu er enn fremur bent á að fyrstu níu mánuði ársins hafi nærri 380 þúsund ferðamenn farið um Leifsstöð og er það 16,5 prósent fjölgun frá sama tímabili í fyrra. Athygli vekur að ferðamönnum frá Bandaríkjunum hefur fækkað úr 47 þúsund í 44 þúsund en ferðamönnum frá Bretlandi fjölgaði um 6500 og eru þeir fjölmennastir í hópi erlendra ferðamanna eða rúmlega. Norðmönnum og Svíum fjölgaði einnig allnokkuð.

Ársæll Harðarson, forstöðumaður markaðssviðs Ferðamálastofu, segir að aldrei fyrr hafi verið jafnmikið framboð af flugsætum og hótelherbergjum fyrir hendi. „Við áttum von á þessum fjölda í sumar og það hefur verið góður gangur víðast hvar. Nú er svo að sjá hvernig gengur í vetur að viðhalda vexti síðustu missera. Það má hvergi slaka á í markaðs- og sölumálum á mörkuðum," segir Ársæll.