Á þriðja tug með réttarstöðu sakbornings í TR-máli

Á þriðja tug manna hefur hlotið réttarstöðu sakbornings í rannsókn efnahagsbrotadeildar Ríkislögreglustjóra á fjársvikum fyrrverandi starfsmanns Tryggingastofnunar ríkisins sem upp komst í fyrra, en svikin eru talin nema tugum milljóna.

Fram kemur í tilkynningu frá Ríkislögreglustjóra að rannsókn málsins sé á lokastigi og segir Ríkislögreglustjóri máli feykilega umfangsmikið, en málsskjöl fylla nú 30 möppur.

Vísa ásökunum um seinagang á bug

Í tilkynningunni vísar Ríkislögreglustjóri einnig ásökunum Karls Steinars Guðnasonar, forstjóra Tryggingarstofnunar, um seinagang í rannsókn á tveimur öðrum málum á bug. Málin tvö lúta að meintum svikum tannlæknis og svæfingalæknis en Karl Steinar gagnrýndi lögreglu fyrir framgang í málunum í fréttum Ríkissjónvarpsins þann 24. október.

Þar hélt Karl Steinar því meðal annars fram að tannlæknirinn hefði verið grunaður um svik í 14 ár en erfiðlega hefði reynst að „mjaka málinu áfram hjá lögreglunni". Ríkislögreglustjóri segir þetta rangt og að kæra í málinu hafi ekki borist fyrr seint í september í fyrra. Málið hafi fljótlega verið sent staðarlögreglu til rannsóknar og þar sé það enn.

Það hafi hlotið eðlilega meðferð hjá lögreglu eftir að kæra barst og það að umræddur tannlæknir var ekki kærður fyrr til lögreglu hljóti að vera algerlega á ábyrgð TR. Þá hafnar lögreglan því að skortur á þekkingu hamli rannsóknum á málum.

Rannsókn á svæfingarlækni á frumstigi

Um mál svæfingarlæknisins, sem kært var í lok júní, segir Ríkislögreglustjóri að enn sé verið að afla gagna. Þau hafi verið ófullnægjandi þegar kæra barst. Rannsókn sé enn á frumstigi og engan veginn sé hægt að gagnrýna embættið vegna meðferðar þess.

Segir Ríkislögreglustjóri að þótt alltaf sé hægt að gera betur sé fullyrt að þeir lögreglumenn sem sinna rannsóknum mála hjá efnahagsbrotadeildinni standi sig einkar vel í starfi.