Ráðgjafastarf Regnbogabarna lagt niður

Töluverðar breytingar verða gerðar á starfsemi samtakanna Regnabogabörn á næstunni. Eina stöðugildi samtakanna verður lagt niður um áramótin vegna fjárskorts.

Samtökin Regnbogabörn voru stofnuð af leikaranum Stefáni Karli Stefánssyni árið 2002 í kjölfarið á mikilli umræðu sem skapast hafði um einelti á Íslandi.

Starfsmaður var ráðinn í fullt starf til að bjóða upp á ókeypis ráðgjöf fyrir þolendur eineltis, gerendur og aðstandendur. Sá starfsmaður lætur af störfum um áramótin og ekki verður ráðinn annar í hans stað.

Valgeir Skagfjörð, formaður samtakanna, segir að sú ókeypis ráðgjöf sem samtökin hafi boðið upp á hafi ekki verið nógu vel nýtt. Þeim litlu fjármunum sem Regnbogabörn hafi úr að spila sé betur varið í annars konar starf eins og forvarnarverkefni og fræðslu.

"Það er dýrt að halda úti starfsmanni í fullu starfi," segir Valgeir og bætir við að sú þjónusta sem Regnbogabörn hafi haldið úti eigi að vera á höndum hins opinbera.