Leikfangasali segir neytendakönnun ranga

Dúkkuhúsin vinsælu sem Neytendasamtökin gerðu verðsamanburð á eru ekki seld í Dótakassanum á Akureyri, að því er Finnur Gunnlaugsson, eigandi verslunarinnar fullyrðir.

Í fréttum í morgun var sagt frá því að leikfangahúsið Biggest littlest Petshop kostaði 12 þúsund krónur í Dótakassanum og væri 84% dýrari en í Fríhöfninni.

Finnur segist eiga nýrri gerð af húsinu í verslun sinni og kosti hún 7900 krónur. Hann furðar sig af fréttum af málinu og segir fáránlegt að bera verð í verslunum á Akureyri og í Reykjavík saman við verðið í Fríhöfninni á Keflavíkurflugvelli þar sem varan er tollfrjáls.

Hjá Neytendasamtökunum fengust þær upplýsingar að starfsmaður þeirra hafi farið inn í verslunina til að kanna verðið og að annar starfsmaður hafi hringt til að útiloka allan misskilning. Því hafi verið vandað til verka en aldrei sé hægt að útiloka mistök.