Hefja samþættingu heimahjúkrunar og félagslegrar heimaþjónustu

Heilbrigðisráðuneytið hefur hafið undirbúning að samþættingu heimahjúkrunar og félagslegrar heimaþjónustu í samræmi við tilraunaverkefni Reykjavíkurborgar og ráðuneytisins. Nú þegar hafa nokkur sveitarfélög leitað eftir samstarfi um slíka samþættingu.

Þetta kemur fram í tilkynningu frá heilbrigðisráðuneytinu. Þar segir ennfremur að undanfarna mánuði hafi ráðuneytið í samstarfi við Velferðaráð Reykjavíkurborgar leitað leiða til að efla heimahjúkrun og félagslega heimaþjónustu í Reykjavík. Skoðað hafi verið með hvaða hætti skynsamlegast sé að standa að tilraunaverkefni að þessu tagi.

Þá segir í tilkynningunni að frá árinu 2004 hafi verið unnið að því að samþætta félagslega heimaþjónustu Reykjavíkurborgar og heimahjúkrun í Reykjavík. Ráðist hafi verið í verkefnið í framhaldi af samkomulagi ríkisstjórnarinnar og Landssambands eldri borgara frá árinu 2002. Reynslan hafi sýnt að skipulagt samstarf þarna á milli skili sér í betri yfirsýn yfir þarfir notenda og heildstæðari þjónustu við hvern og einn. Því sé það mat ráðherra að það sé tímabært að stíga næstu skref til að ná betri árangri.