Leggja áherslu á hækkun lægstu launa í komandi kjarasamningum

Lögð verður megináhersla á hækkun lægstu launa og kaupmáttaraukningu í komandi kjarasamningum að sögn Sigurðar Bessasonar, formanns samningarnefndar Flóafélaganna og Boðans. Þetta kom fram á fundi félaganna með Samtökum atvinnulífsins í dag.

Á fundinum voru helstu stefnumið félaganna kynnt en í gærkvöldi samþykkti aðalsamninganefnd félaganna almenna stefnumörkum vegna komandi kjarasamninga. Þar er meðal annars lögð áhersla á að stjórnvöld tryggi stöðugleika og lækkandi verðbólgu til að launahækkanir skili sér í auknum kaupmætti. Þá vilja Flóafélögin semja til tveggja ára með traustum tryggingarákvæðum gagnvart verðbólgu og launum annarra eins og kemur fram í fréttaskeyti.

Ennfremur verður lögð áhersla á að útrýma launamun kynjanna og unnið að því að stytta heildarvinnutímann á samningstímabilinu. Þá vilja félöginj ennfremur ræða við Samtök atvinnurekenda um hvernig bæta megi veikinda-, slysa-, lífeyris, og örorkuréttindi á almennum vinnumarkaði.