REI hafnar útreikningum ráðherra

„Við getum ekki fallist á þessa tölu sem Össur nefnir. Enn er aðeins um þreifingar að ræða og því er of snemmt að festa einhverja tölu á samninginn, það er ekkert í hendi enn“ segir Hafliði Helgason upplýsingafulltrúi REI í samtali við Vísi.

Össur Skarphéðinsson, iðnaðarráðherra, er nú á leið frá Indónesíu þar sem meðal annars var undirritaður samningur milli REI og Pertamina sem er orkufyrirtæki í Indónesíu og er alfarið í eigu ríkissins.

Össur hefur sagt á bloggsíðu sinni að samningurinn sé metinn á um 60 milljónir dollara, eða 4 milljarða íslenskra króna.

Hinn frægi 20 ára samningur sem kvað á um að REI hefði forkaupsrétt á öllum verkefnum Orkuveitunnar erlendis í 20 ár var meginstoðin í 8 milljarða króna verðmati á óefnislegum eignum Orkuveitunnar.

Ef þessi tala Iðnaðarráðherra er rétt, er athyglisvert að REI er nú þegar búið að borga upp helminginn af 20 ára samningnum með sínum fyrsta samningi sem fyrirtækið gerir erlendis.

Hafliði lagði hinsvegar ríka áherslu á að það væri sannarlega ekki mat REI að samningurinn sé 4 milljarða króna virði, of snemmt sé að setja nokkurn verðmiða á samning REI og Indónesíska orkufyrirtækisins Pertamina.

Samningur REI og Pertamina felur í sér að fyrirtækin vinni að sameiginlegri þróun á þekkingu og reynslu á sviði jarðvarmarannsókna. Stefnt er að því að samstarf þetta leiði til þess að jarðvarmi verði nýttur enn frekar í Indónesíu.