Fjörutíu og sjö umferðaróhöpp á höfuðborgarsvæðinu

Hálkan í gær virðist hafa komið borgarbúum á óvart en tilkynnt var um fjörutíu og sjö umferðaróhöpp á höfuðborgarsvæðinu. Í tilkynningu frá lögreglu kemur fram að það sé óvenju mikið. Flest voru óhöppin minniháttar en fjórir ökumenn stungu af eftir áreksturinn.

„Sem fyrr var talsvert um aftanákeyrslur en ökumönnum hættir til að gleyma þeirri góðu reglu að hafa hæfilegt bil á milli ökutækja," segir í tilkynningunni. Þá vill lögreglan sömuleiðis minna á þá staðreynd að veturinn er á næsta leiti og því er rétt að huga að því að setja vetrardekkin undir. „Að sama skapi er mikilvægt að skafa rúðurnar áður en haldið er af stað út í umferðina."

Tveir voru teknir fyrir ölvunarakstur í Reykjavík í gærkvöld. „Fyrst var karl á fertugsaldri tekinn fyrir þær sakir á Suðurlandsbraut en bíll mannsins hafnaði þar á ljósastaur. Síðan var karl á þrítugsaldri stöðvaður á Sæbraut en sá var sömuleiðis ölvaður undir stýri."

Þá segir að för karls á þrítugsaldri hafi verið stöðvuð í miðborginni í hádeginu í gær en sá hefur aldrei öðlast ökuréttindi. „Hann ók bíl sem reyndist ótryggður og voru skráningarnúmerin því fjarlægð. Þrír ökumenn voru teknir fyrir að aka gegn rauðu ljósi og jafnmargir fyrir að tala í síma án þess að notast við handfrjálsan búnað."