Bæjarstjórinn svarar ásökunum

Bæjarstjórinn á Akureyri hefur sent frá sér tilkynningu vegna frétta af samskiptum bæjarins og eiganda verslunarinnar Síðu. Sigrún Björk Jakobsdóttir segir að í kjölfar ásakana Höskulds Stefánssonar um að bærinn hafi sýnt honum yfirgang varðandi brottflutning verslunarinnar vegna byggingarframkvæmda vilji bærinn koma sínum sjónarmiðum á framfæri.

„Formleg samskipti um þetta mál hófust 21. ágúst 2006, þ.e. fyrir meira en ári síðan, með bréfi til Höskuldar og síðan hafa honum verið send fleiri bréf, gefinn andmælaréttur, fundað um málið með honum auk símtala við hann," segir í yfirlýsingu frá bænum sem undirrituð er af bæjarstjóra. „Samskiptin og upplýsingastreymið frá Akureyrarbæ hafa því verið miklu meiri en Höskuldur hefur látið af í fjölmiðlum. Á þeim tíma sýndi Höskuldur málinu ágætan skilning og það var ekki fyrr en um miðjan ágúst sl. að andmæli bárust frá honum. Það er því ljóst að Höskuldur hafði á hverjum tíma allar upplýsingar um stöðu málsins varðandi brottflutning verslunarinnar og hafði næg tækifæri til að koma sínum andmælum á framfæri fyrr. Allar fullyrðingar Höskulds um hótanir og yfirgang Akureyrarbæjar eru því algerlega úr lausu lofti gripnar."

Í bréfinu segir að það hafi því verið neyðarráðstöfun hjá bænum að grípa til þess að fá leyfi héraðsdóms til þess að fjarlægja húsið sem hafði samkvæmt samningum tímabundið stöðuleyfi. „Héraðsdómari taldi hins vegar misræmi vera milli þessa tímabundna stöðuleyfis og ófrágenginnar lóðaúthlutunar frá 1984 og því ekki staða til að samþykkja beiðni Akureyrarbæjar. Akureyrarbær mun að öllum líkindum una þessum dómi og semja við viðkomandi aðila um þessi lóða- og húsamál," segir að lokum.