Vilja lausn á viðvarandi manneklu á Skjóli

Fulltrúi í stjórn Aðstandendafélags heimilisfólks á hjúkrunarheimilinu Skjóli segist hafa orðið fyrir ákveðnum vonbrigðum með fund með heilbrigðisnefnd Alþingis í morgun. Þangað leituðu fulltrúar í stjórninni ásamt fulltrúa frá aðstandendafélagi Droplaugastaða til þess að ræða viðvarandi manneklu á hjúkrunarheimilunum.

Gylfi Páll Hersir, fulltrúi í stjórn Aðstandendafélags heimilisfólks á Skjóli, segir að óskað hafi verið eftir fundinum þar sem ástandið á Skjóli hefði ekkert skánað í eitt ár. Hann bendir á að aðstandendafélagið hafi leitað til Landlæknis í fyrra vegna málsins og hann hafi komist að því mönnun á mörgum hjúkrunarheimilum væri mjög slæm og skortur væri á fjármagni til málaflokksins. Félagið hafi einnig fundað með heilbrigðsráðherra og heilbrigðis- og trygginarnefnd í fyrra en frá þeim tíma hefði ekkert gerst.

„Því er ekki að neita að fundurinn í dag olli okkur ákveðnum vonbrigðum. Við fengum engin skýr svör heldur kom aðeins fram sú almenna afstaða að ástandið væri batna smátt og smátt. Við höfðum vonast til þess að heilbrigðisnefnd lýsti því yfir að það þyrfti að gera stórátak í þessum málum," segir Gylfi Páll um fundinn með heilbrigðisnefnd í morgun. Hann á von á að aðstandendafélagið fundi með fjárlaganefnd á næstunni áður en fjárlögin verða tekin til annarrar umræðu á Alþingi.

Auk manneklunnar ræddu fulltrúar aðstandendafélagsins um tvíbýlisherbergi á Skjóli og hvort til stæði að láta fólk sem ekkert þekktist búa áfram saman í herbergi. Gylfi Páll bendir á að í 42 herbergjum af 99 á Skjóli búi fólk í tvíbýli. Þá vildi aðstandendafélagið að innra starf hjúkrunarheimilisins yrði eflt þannig að heimilismenn fengju aukna líkamlega og andlega örvun.